LEGAZPI CITY- Nagpupuon nang magdayo an mga turista sa Donsol, Sorsogon ngani na mahiling an mga butanding na famosong tourist attraction sa lugar.
Katakod kaini, antes pa man mag-abot an summer season, puga-puga na sa preparasyon an tourism office kan probinsya.
Sa intribista ki Desiree Abitria, tourism officer kan Donsol, sinabi kaini na mas amay na nag-pasyar an mga butanding kan nakalihis na taon kumpara sa ngunyan kun kaya nag-aarabutan pa sana an mga dayuhang turista.
Mientrastanto, padagos man suboot an saindang pagpapautob nin mga patakaran sa mga nagdadayo ngani na mahiling an nasambitan na hayop ngani na masiertong naaataman an seguridad kan mga ini asin magtinir pa sa lugar.
Sigon ki Abitria, kun minsan, dae ninda maga-garantiya sa mga turista na makakahiling sinda nin butanding alagad urog na pigtututukan suboot ninda an kaligtasan kan mga hayop.
Dugang pa kan opisyal, pigsi-sierto man ninda magin an seguridad kan mga nagdadayong tawo.
Piglalaoman na madakol pa an mga turista sa butanding attraction sa Semana Santa asin bulan kan Mayo.
