LEGAZPI CITY—Pigdeklarar na kan Department of Agriculture na avian influenza-free na an probinsya kan Camarines Norte, ini kasunod na man kan mga nairehistrong bird-flu sa nasambitang lugar.
Segun ki DA Bicol Spokesperson Lovella Guarin, sa intrevista kan Bombo Radyo Legazpi, ini makalihis an mga isinagibong surveillance asin collection of samples na kun saen wara nang nagluluwas nin positive.
Sinabi kaini na an mga lakdang na isinagibo ngani mapuho an helang iyo an sa paagi kan pagtatarabangan kan lokal na gobierno, Department of Agriculture, Bureau of Animal Industry, mga pribadong sektor magin kan konsomedores asin poultry farmers.
Segun saiya na kan may nairehistrong nagpositibo, nagkaigwa nin depopulation sa 500-meter radius asin nagkundusir nin blood correction sa one-kilometer area siring man an pagbugtak nin mahihigot na mga checkpoint sa luwasan asin laogan kan provincia.
Dugang kaini na an mga naapektaran saindang pigtatawan nin mga magkakanigong asistensya.
Huli sa pagdeklarar kan avian influenza-free sa lugar, pigtaram kaini na ligtas na an mag-ataman asin bako na limitado an mobility transport kan mga poultry.
Alagad nagpatanid man giraray ini sa publiko na iobserbar an security measures siring kan paghugas nin kamot pagkatapos na ma-expose sa poultry birds.
En kaso maobserbaran na biglang magadan an atamang hayop dapat tulos ining i-report sa mga Municipal Agriculture Office nganing maagapan asin dae na magkalat.
Mietrastanto, sinabi kan opisyal na maski naideklarar nang bird-flu free na an provincia kan Camarines Norte kaipuhan na iobserbar an biosecurity measures lalo na an mga nag-aataman na poultry animals siring man an pag-obserbar kan distansya kan mga manok na may toltol na kulungan, tamang pagpapakaon asin limitahan an exposure sa mga ‘elements’ na pwedesir magdara nin virus.
