LEGAZPI CITY—Pighayag ni Albay Provincial Administrator Raul Rosal na may nanutaran an saindang grupo na pagkukudal na yaon sa laog kan 4 kilometer permanent danger zone kan Bulkang Mayon.
Segun ki Albay Provincial Administrator Raul Rosal, sa intrevista kan Bombo Radyo Legazpi, na mantang may na-obserbaran sinda na may quarry sa lugar, an pinakapangenot suboot na aktibidad digdi an pagkudal sa pamitisan kan bulkan na sakop kan permanent danger zone.
Segun saiya na nagtutugdok suboot digdi nin concrete fencing asin posibleng haloy na ining pigkokonstruir sa lugar.
Dae man suboot nagpahiling nin dokumentos an mga nagtenir digdi kan pighapot kun sainda an lugar na pigkukudalan.
Dugang ni Rosal na maabot suboot sa 70 empleyado asin nasa 3 bulan nang nagtatrabaho sa lugar kun saen duman na suboot an mga ini nagkakaturog.
Garo suboot na empleyado an mga ini kan Sunwest Inc., asin aldawan, basado na man sa saindang naka-olay sa lugar.
Tinawan-duon ni Rosal na delikado an magtenir sa permanent danger zone kan bulkan urog na pagkabanggi.
Sa presente, plano kan provincial administrator na ipaaram ki Governor Noel Rosal an isyu, asin mawot niyang irekomenda na ipababa an mga naabutan nindang persona sa lugar huli sa delikado ini para sa sainda.
