LEGAZPI CITY – Personal na nagbisita sa provincia kan Catanduanes si Department of Energy Undersecretary Mario Marasigan nganing resolbaran an saindang problema sa kuryente.
Segun ki Governor Patrick Azanza sa intrevista kan Bombo Radyo Legazpi na afuera sa DOE an kabale man sa nagbisita sa provincia an mga representante kan Electric Power Industry Management Bureau, National Electrification Administration, Energy Regulatory Commission, National Power Corporation, Transco asin National Power Corporation.
Tututukan suboot kan inapod na composite team an bako sana sa power supply kundi pati man an distribution lines asin iba pang problema kan mga Catanduanon pag-abot sa orolay kan kuryente arug kan kahagadan ninda na pagpapababa kan presyo kan kuryente hale sa renewable sources.
Nagpapasalamat man siya huli ta pigtututukan kan National Government an pagtatao nin panghaluyang sulusyon kan kuryente kan mga lugar na dae kabale sa main grid na haloy na nindang piglalaoman na maikonekta an saindang provincia.
Pigtaram pa kan opisyal na madurar sa isla provincia an composite team nin sagkod apat na aldaw para sa komprehinsibong pag-aadal asin masulusyunan an agrangay kan mga miembros konsumidores.
Nagmamawot man si Governor Azanza na an report na gigibuhon kan mga ahensya kan gobierno an magigin paborable sa sainda sa ibong kan kadakol na aspeto an pighihiling dapit digdi arug kan pulitika asin negosyo.
