LEGAZPI CITY – Dae pa nagbabalik hasta sa ngonian an company driver kan National Economic and Development Authority (NEDA) Bicol makalihis an limang aldaw na pagkawara.
Palsok man asin warang nagsisimbag sa gamit na cellphone ni Vicente Macasinag, 60-anyos.
Sa intrevista kan Bombo Radyo Legazpi ki Emily Macasinag, pamangkin kan nawawarang driver, amay na naghali si Vicente kan Lunes, Setyembre 23 sa residencia sa Purok 2 Brgy. Ilawod kan Camalig, Albay tangarig na maglaog sa trabaho.
Kinumpirmar man ini kan driver kan pampasaherong jeepney na pirming nalulunadan ni Vicente kun sain nahiling pa an pagbaba sa may CAT College sa ciudad kan Legazpi.
Duman kaya suboot ini naghahalat nin jeep na malulunadan pasiring sa regional center site sa Brgy. Rawis.
Alagad alas-6:00 na kan banggi kan kaparehong aldaw kan dae man ini mag-uli sa harong na rason tangarig na maghadit na an pamilya.
Segun pa ki Emily, wara man sinda nanonotaran na kakaibang hiro kan tiyuon o posibleng problema mantang bisto man ining mabuot na tawo.
Apela kan pamilya na tulos ipagtaong-aram kun may mahiling na lalaking nakasulot na gray na jacket asin backpack na mahiling.
Napag-araman na ngonian na aldaw man an pagselebrar ni Vicente kan ika-60 compleaño.
