Pigrekomendar kan Commission on Audit an mas mahigot na mga lakdang, kaibanan na an pagpugol sa sweldo asin pag-imponir nin mga penalidad kontra sa mga opisyales kan Department of Education na nagpalyar na mag-liquidate kan cash advances na nagkakantidad nin P6.96 billion basado sa datos kan Disyembre 31, 2023.
Basado sa 2023 Annual Audit Report, sinabi kan ahensya na nagpalyar an DepEd na magsunod sa mga ley asin regulasyon na nagresulta sa unliquidated cash advances.
Kaibanan sa mga kapabayaan an pagtugot sa cash advances na warang magkakanigong otorisasyon, paglipipat kan pondo sa pagultangan kan accountable officers, asin pagbabayad nin mga gastos siring kan Service Recognition Incentives sa paagi kan cash advances imbes na an direktang pagbabayad.
Basado sa report kan ahensya na kaibaan sa mga rehiyon na igwang pinakahalangkaw na unliquidated balances an Region VII o Central Visayas na igwang 1.31 billion, Region VIII o Eastern Visayas na igwang 1.01 billion, mantang 819.4 million man sa Region XII (SOCCSKSARGEN) asin 537.1 million sa Region IX o Zamboanga Peninsula.
An Region VI o Western Visayas an igwa man na unliquidated balances na nasa 513.9 million asin 301.9 million man sa National Capital Region.
Mientras tanto, ngani na maresolberan an isyu pigrekomendar kan Commission on Audit an pagpupundo kan panibagong cash advances sa mga opisyales na igwang pending na mga balanse, pagpapaluwas nin demand letters sa mga aktibong empleyado ngani na ma-obliga na magsunod sa liquidation, asin pugulon an sweldo kan mga delinquent AOs hasta sa ma-settle an saindang mga obligasyon.
Ma-imponir man an ahensya nin penalidad sa irarom kan rules kan Civil Service Commission huli sa delays asin pagsusurat nin dormant accounts na dae naresolberan sa loag nin labi sa dekada.
Napag-araman man sa nasabing report na sa nagkapirang kaso, an mga outstanding balances an pigkaka-imbweltuhan kan mga accountable officers na nagretiro na, nag-resign na, AWOL, o naglipat na-transfer.
