Sinuspinde kan Commission on Elections (Comelec) an proklamasyon kan Duterte Youth asin Bagong Henerasyon party-lists huli sa mga nakabinbing petisyon para sa saindang diskwalipikasyon.
Segun sa resolusyon kan National Board of Canvassers, “seryoso an alegasyon” kan pagbayolar sa ley sa pirilian na isinunad laban sa duwang party-list.
Magigirumduman na an mga petisyon na laban sa Duterte Youth an isinunad ninda Reeva Magtalas asin iba pa kan Mayo 15, asin kan Youth Advocates for Climate Action Philippines kaiba an student regents kan PUP asin UP kan Mayo 8 mantang sarong abogado na si Russel Stanley Geronimo man an nagsunad nin kaso laban sa Bagong Henerasyon.
Mahigot na pigtutulan kan Duterte Youth an suspensyon asin inapod ining “grave abuse of discretion.”
Nagpatanid man an chairman ninda na si Ronald Cardema na ibubuyagyag an suboot katiwalian sa Comelec asin Kongreso kun dae sinda papatukawon.
Mientrastanto, sinabi kan Bagong Henerasyon na wara sindang naresibi na abiso mapadapit sa kaso asin nangapodan sa Comelec na ituloy an saindang proklamasyon bilang representante kan labi 319,000 botante.
Sa presente igwang nakuwang 5.6% na boto an Duterte Youth na katampad nin tulong puwesto sa Kongreso, mantang may sarong puwesto man an Bagong Henerasyon huli sa nakuwang 0.8% na boto.
 has suspended the proclamation of the Duterte Youth and Bagong Henerasyon party-lists due to pending petitions for their disqualification.){kind=link}