Mabukas na giraray sa aga, Setyembre 1 an voter’s registration kan Commission on Elections (COMELEC).
Kasabay kaini an pagbaba nin nagkapirang patanid sa publiko urog na sa modified registration procedure asin protocols sa tahaw kan COVID-19.
Bukas an Office of the Election Officer sa pagresibe kan aplikasyon puon Martes hasta Sabado, kaibanan an holidays puon alas-8:00 nin aga hasta alas-3:00 nin hapon.
Alagad wara munang satellite voter’s registration.
Antes man na magpasiring sa oficina, kaipuhan munang mag-download kan application form hali sa www.comelec.gov.ph para sa pag-fill out kan mga pighahagad na detalye afuera na sana sa pagpirma na gigibuhon sa mismong COMELEC office gamit an sadiring ballpen kan maparehistro.
Sa mismong aldaw kan pagpasiring sa oficina, pagirumdom sa publiko an health protocols na dapat sundon siring kan pagkua kan temperatura kan maparehistro, health declaration, “No Face Mask and Face Shield, No Entry” policy, physical distancing sa paagi kan limitadong numero kan transaksyon o tawo na papalaugon asin iba pa.
