Kinumpirmar kan dating bodyguard-driver ni dating Presidente Rodrigo Roa Duterte na “Superman” an call sign kan dating mayor kan Davao City.
An sinabi kan retiradong pulis na si Sanson Buenaventura an pagkumpirmar kaini sa mga nagin pahayag kan nagkapirang personalidad arog kan mga dating miyembro kan pigkakatakutang Davao Death Squad (DDS).
Si Buenaventura, na nagin bodyguard asin driver ni Duterte puon 1988 sagkod 2008, an pighapot ni Batangas 2nd District Rep. Gerville “Jinky Bitrics” Luistro sa pag- atendir kaini sa pagdangog kan Quad Committee kan kamara de Representantes kan Huwebes.
Sinabi ni Buenaventura na Superman an apod kay Duterte kan nagkapirang grupo sa Davao City.
Kan pig-usisa ni Luistro, sinabi ni Buenaventura na wara ining aram sa pigsasabing DDS asin media lang suboot an naggibo kan apod na ini.
Ipirumdom man ni Luistro an naging pahayag ni Duterte sa pagdangog kan Senado kun saen sinabi kaini na igwang DDS.
Sa paghahapot ni Luistro, inamin ni Buenaventura na loyal ini kay Duterte.
An pangaran ni Buenaventura an pirang beses na nunambitan sa mga testimonya kan manlaen laen na tawo na nagtaram katakod kan DDS.
Sinabi kan self-confessed DDS hitman na si Arturo Lascañas, sa saiyang affidavit kan 2017, na si Buenaventura an igwang dakulang papel sa DDS asin iyo an responsable sa logistik asin kwarta siring man na nagsisirbing liaison tanganing maipaabot an mga kasuguan ni Duterte.
Segun kay Lascañas na si Buenaventura an nagbababa nin mga kasuguan ni Duterte arog kan mga gagadanong indibidwal.
Sa affidavit man kan sarong “Jose Basilio” pigladawan kaini si Buenaventura bilang operational “big boss” kan Heinous Crime Investigation Section, na nasa likod suboot kan pagtatao nin clearance sa operasyon kan DDS na nagtatarget sa mga kriminal.
Segun kay Basilio an mga kasuguan hale kay Buenaventura an pigtutubudang gikan kay Duterte kaya pigsusunod ini kan mga miyembro kan DDS.
Naunambitan man ni dating Philippine Charity Sweepstakes Office General Manager Royina Garma na si Buenaventura suboot an nagtatao nin P20,000 reward sa mga station commander sa kada nagagaadan nindang drug suspect.
