LEGAZPI CITY—Nagkundusir an Coast Guard District Bicol nin ‘Capability Display’ sa sarong mall sa ciudad kan Legazpi.
Segun ki Coast Guard District Bicol Ensign Paul Laurence Literal, sa intrevista kan Bombo Radyo Legazpi, obheto kan aktibidad na mapahiwas an public awareness siring man ngani na mai-promote an disaster preparedness asin maritime safety.
Ipigpresenta sa nasabing aktibidad an mga specialized equipment asin assets na piggagamit kan saindang mga personahes pag-abot sa emergency response, disaster response, maritime security, maritime safety asin marine environmental protection.
Sa paagi kan saindang mga trained personnel nakapagtao sinda nin impormasyon mapadapit sa mga tamang lakdang na nagagamit sa oras kan emerhensya nganing maibitaran an ano man na dae piglalaomang insidente partikularmente an pag-abot sa katubigan.
Dugang ni Literal na maabot sa 500 indibidwal an nagpartisipar sa primerong aldaw kan nasabing aktibidad.
Mientrastanto, pig-imbitaran man kan opisyal an publiko na magbisita sa saindang exhibit na madurar sagkod sa Hunyo 12, 2025.
