LEGAZPI CITY-Tinatsaran kan Commission on Audit (COA) an Office of the Vice President (OVP) sa pagtao nin haros P3.4 milyon sa mga benepisyaryo kan saindang livelihood program na warang pag-analisar sa feasibility asin economic viability kan saindang mga proyekto.
Susog sa audit, sa irarom kan programang “Mag Negosyo Ta ‘Day”, 128 indibidwal asin 10 organisasyon an nakaresibe nin tabang kan 2024, na nagkakantidad nin P1.92 milyon asin P1.5 milyon, segun sa pagkakasunod-sunod.
Mantang kwalipikado an mga benepisyaryo, dai man suboot nabusisi kan Department of Trade and Industry (DTI) asin Philippine Deposit Insurance Corporation (PDIC) an saindang mga project proposals.
Sinabi man sa report na warang nakasurat na written agreement sa pagultanan kan OVP asin kan ahensya para sa pagrepaso kan mga propwesto.
Segun sa focal person para sa programa na dipisil na ipasa an review sa ibang ahensya huli sa kawaran nin kasunduan.
Marurumduman na kan Oktubre 29, 2024, nagpaluwas an OVP nin sarong rebisado na manual kan mga operasyon para sa programa asin nagkondusir nin reorientation sa mga Satellite Office leads kan Pebrero 6, 2025.
Nagsagibo man suboot an opisina kan bise nin project assessment tool ngani mabusisi an mga propwestong proyekto kan mga aplikante.
