Kinumpirmar kan Philippine National Police (PNP) na presente nang nasa saindang kustodiya an saro sa mga mastermind sa nagin kidnapping-slay case kan filipino-chinese businessman na si Anson Que asin driver kaini na si Armanie Pabillo na binisto bilang si Kelly Tan Lim.
Sa sarong pulong balitaan an ibinuyagyag ni Police Regional Office III Director asin PNP Spokesperson PBGen. Jean Fajardo na nadakop an suspek sa sarong pribadong resort sa Boracay, Aklan kun saen kaiba kaini an saro pang chinese national na binisto man bilang si Wu Ja Bing na saro mang hair dresser.
Segun ki Fajardo, naglunsar nin sarong manhunt operations an saindang hanay katabang an pirang operatiba hale sa Armed Forces of the Philippines (AFP) asin magin hale sa National Security Council (NSC) nganing matunton an lokasyon kan mga ini.
Susog sa saindang naresibing intel, poon kan nagcheck-in an suspek an dae na ini nagluwas asin ginagamit si Wu Ja Bing bilang tagaproseso kan saindang pagtenir sa mga nasabing resorts poon kan Abril 26 hasta Mayo 1.
Dugang pa ni Fajardo, natunugan na ni Kelly Tan Lim an mga presensya kan kapulisan huli ta nagporbar pa suboot na maghale an suspek dara an saiyang mga magurang asin pirang mga menor de edad alagad dae ini natuloy.
Nagsirbi mang frontman si Wu Ja Bing para sa suspek na siyang naghahampang sa mga transaksyon nganing dae mapaghinalaan sa lugar urog nang igwang 10 milyong patong sa payo an suspek.
Sa presente an nagsasairarom na sa mga inquest proceedings si Kelly Tan Lim asin an kasabwat kaining si Wu Ja Bing na nahahampang sa mga kasong kriminal asin nagtetenir man sa kustodiya kan PNP- Anti Kidnapping Group.
Piglalaoman man kan mga imbestigador na si Kelly Tan Lim na an makakataram kun saen napaduman an dakulang kantidad kan ransom money na naresibi kan mga kidnappers ni Anson Que.
 confirmed that one of the masterminds in the kidnapping-slay case of Filipino-Chinese businessman Anson Que and his driver Armanie Pabillo identified as Kelly Tan Lim is now in their custody.){kind=link}