LEGAZPI CITY—Nagkundusir an Coast Guard District Bicol nin emergency medical evacuation sa sarong crew member kan barkong MV Yue Dian 58 na nakaangkla sa rayong 0.75 nautical miles sa kadagatang parte kan Legazpi City, Albay.
Segun ki CG District Bicol Ensign Alyssa Novie Bermal, sa intrevista kan Bombo Radyo Legazpi, na nakaabot an report sainda sa paagi kan request for assistance gikan sa ahente kan barko kun saen pigtaram na kinakaipuhan nin medical evacuation.
An imbuelto sa insidente sarong 21-anyos na lalaking engineer kan barko asin ini nalugadan sa walang kamot makalihis na mahulog sa naunambitang barko.
Mientrastanto, liwat man nagpagiromdom na kun may nangangaipuhan nin tabang na may kinaaraman sa trabaho kan coast guard na pwedesir ining ipaaram sa pinakaharaning istasyon asin preparado man sinda na maghatod nin serbisyo publiko.
