LEGAZPI CITY- Dakulang danyos an iwinalat kan bagyong Kristine sa provincia kan Catanduanes basado sa nagin monitoring kan mga ahensya de gobierno.
Segun ki Catanduanes Provincial Disaster Risk Reduction and Management Office Operations Chief Robert Monterola sa intrevista kan Bombo Radyo Legazpi na igwang nasa 93, 484 na mga indibidwal o katumbas nin 27, 347 pamilya an naapektaran kan nakalihis na kalamidad.
Basado man sa datos kan provincia engineering office nasa P55 million an danyos sa sektor kan imprastruktura alagad sa datos kan Department of Public Works and Highways sa mga tulay asin tinampo, uminabot sa labi P105 million an pigkakarkulong danyos.
Igwa man na 295 na totally damaged na harong asin 312 na partially damaged na mga harong sa provincia.
Basado an sa huring datos, igwang nasa 13 nairido asin limang nagadan huli sa nasabing kalamidad.
Ipinagpapasalamat man kan opisyal na wara ng mga pagbaha sa ngunyan kaya padiit-diit ng nakakabangon an mga residente.
Mientras tanto, sinabi ni Monterola na sa presente wara pang nareresibe na ayuda an provincia kan Catanduanes kaya pinagkakasya na muna an pondo na igwa an gobierno provincial.
Aminado an opisyal na madali na man na maubos an saindang resources kaya dae pa nakakapagpaabot nin tabang sa mga residente na narautan nin harong.
Mientras tanto, naghahanda na man ngunyan an islad province para sa panibagaong raot nin panahon na nagdadara nin huma sa nacion.
