LEGAZPI CITY – Napabale liwat an Catanduanes State University sa Times Higher Education Impact Rankings 2025.
Segun ki Catanduanes State University Director of the International Affairs Office Zyra Mae Tumala sa intrevista kan Bombo Radyo Legazpi na ini na an saindang ikaduwang taon na nakasabay sa prestihiyosong ranking kan gabos na mga university and colleges sa enterong kinaban mantang nagdakol na man an saindang isinumite kompara kan nakalihis na taon.
Sa paagi suboot kaini an dae mamaliiton an saindang unibersidad huli sa magayon na kinaluwasan kan saindang piggigibong lakdang na mapaparahay bako sana an saindang mga estudyante kundi an mga residente kan nasabing provincia.
Nagin mapagal man an saindang inagihan huli ta nagbabalyo pa sinda nin dagat nganing makabale sana sa mga seminar asin kadakol an mga papeles na kaipuhan nindang isumite nin pasaro-saro.
Pag-istorya pa kan opisyal na pigkokonsidera ninda an trayumpo bilang bonus huli sa saindang magayon na kamawotan para sa saindang unibersidad mantang pigpunto man niya na maski ranking sana ini alagad nabubuhay sinda para sa positibong pagbabago asin magdara nin impact sa mga namamanwaan.
Bako man sana suboot ini an mga world ranking na saindang naguno kundi may mga iba pa kun kaya kaipuhan na pahirarumon pa an orientation asin awareness kan unibersidad asin komunidad nganing malagpasan pa an saindang presenteng ranggo.
May mga nakaka-olay na man ining gikan sa mga darakulang unibersidad sa enterong kinaban nganing mapa-uswag pa an saindang unibersidad asin mapagayon an mga bagay na kaipuhan pang ipakarhay.
Nagtutubod si Tumala na mas matatawan nin prayoridad kan Catanduanes an saindang unibersidad huli sa pagkaka-elihir kan dati nindang presidente bilang bagong governor kan provincia sa pagpapa-angat kan saindang inisyatibo asin sa international ranking sa enterong kinaban.
