LEGAZPI CITY—Nagpuon nang magkundusir nin mahiwasan na checkpoint an Catanduanes Police Provincial Office kan nakalihis na aldaw, Enero 12, ini katakod kan papaabuton na May 2025 elections sa nasyon.
Segun ki PIO Catanduanes PPO Police Lieutenant Colonel Rosalinda Gaston sa intrevista kan Bombo Radyo Legazpi, PNP province-wide an kinundusir kan alas-dose nin maaga kan nakalihis na aldaw mantang kan alas-otso hanggang alas-dies nin aga nagpartisipar an PNP magin an Commission on Elections (COMELEC).
Sinabi kan opisyal na sa pagkundusir kan mga checkpoints, na madudugangan pa ini kan Philippine Army asin Philippine Coast Guard.
Dugang kaini na kasuodma, Enero 12, nagpuon na an gun ban sa nasyon asin matapos sa Hunyo 11, 2025, susog na man sa Comelec Resolution 11067.
An saindang ahensya nagkukundusir nin checkpoints para masierto na warang nagdadara nin badil asin iba pang deadly weapons sa mga pampublikong lugar siring kan buildings, kalsada, parke, pribadong behikulo asin iba pa.
Tinawan-doon kaini na maski may lisensya para magdara nin badil kaipuhan man giraray na otorisado ini kan Comelec.
En kaso man na may magbayolar digdi, posibleng makulong nin saro hanggang anom na taon, mantang kun saro man na empleyado kan gobyerno pwedesir man na magkaigwa nin permanenteng diskwalipikasyon sa public office asin pwedesir na mawara an karapatan sa pagboto.
Mantang kun dayuhan man posible man sindang i-deport alagad kaipuhan muna suboot na iserbi an pagkakakulong.
Mientrastanto, wara man na lugar sa saindang probinsya an nakabugtak sa ‘areas of concern’ kan Comelec.
Nangapudan an opisyal na kaipuhan ninda an kooperasyon kan publiko mapadapit sa Comelec checkpoints.
