LEGAZPI CITY – Nagsagibo nin simulation exercise an Municipal Disaster Risk Reduction Management Office kan Castilla sa Sorsogon bilang paghahanda sa mga nangyayaring aksidente sa tinampo.
Sa intrevista kan Bombo Legazpi kay Edgar Ardales Jr. an head kan Castilla MDRRMC, haros suro-semana ng nakakapagrehistro nin mga aksidente sa tinampo sa banwaan kung kaya napagdesisyonan na isagibo an simulation exercise.
Sa nasabing aktibidad, tinukduan asin ipinahiling kan saindang team an mga dapat na gibohon asin kung papano an pagresponde sa panahon nin aksidente.
May mga team na nakatoka sa pagresibe nin mga apod sa emergency hotline mantang igwa man na nagriresponde sa mismong pinangyarihan kan insidente.
Segun kay Ardales, naging magayon man an dalagan kan programa huli ta dakol na naukodan an saindang mga personahes mantang nakatabang man ini ngani na mas mapakusog pa an saindang sistema sa pagriresponde.
Huli digdi, inasegurar kan opisyal na nakahanda na an saindang team sa anuman na emerhensya sa mga aksidente man o panahon nin kalamidad.
Alagad pangapudan ni Ardales sa publiko, lalo na sa mga motorista na mag-ingat sa pagmamaneho ngani na makalikay sa mga aksidente lalo na ngunyan na panahon na naman nin tag-uran asin mas mahalnas an agihan.
