LEGAZPI CITY — Pighahalat na sana kan Department of Social Welfare and Development (DSWD) Bicol na matapos an Semana Santa ngani na maitao na sa mga kwalipikadong centenarians an saindang promesang cash gift na P100,000.
Sa intribista kan Bombo Radyo Legazpi ki DSWD Bicol Regional Director Arnel Garcia, sinabi kaini na igwa nin 135 na centenarians sa rehiyon alagad 65 pa sana digdi an nakasumiter kan kumpletong dokumento na magpapatotoo na 100-anyos na sinda.
P13.5 million an pondo kan nasambitan na programa kan ahensya para sa taong 2016 kun sain sa ngunyan, nasa proseso na an pay roll para sa mga enot na matatawanan kan cash gift.
Dugang pa ni Garcia, pwedesir pang makabale digdi maski an mga nagadan nang centenarian sa kondisyon na dapat na nag-abot ini nin 100-anyos o labi pa antes o makalihis an pag-implementar kan ley kan Hulyo 17, 2016.
Dae na man suboot kaipuhan pang an mga aplikante an magduman sa saindang opisina huli ta mga social workers na an personal na mabisita sa mga ini ngani na magkua kan mga magkakanigong datos.
Sinabi pa kan opisyal na pighahalat na sana ninda an mga dokumento kan 70 na iba pa urog pa na dae man nin birth certificate an mga centenarians huli ta naraot ini kan World War II.
Klinaro man ni Garcia na warang pigpipili sa programang ini, mapa-pobre o mayaman, basta nag-abot nin 100-anyos asin Filipino citizen.
