LEGAZPI CITY—Padagos an pagbabantay kan mga kapulisan kan Camalig, Albay sa 6-kilometer permanent danger zone kan bulkang Mayon asin mga evacuation centers huli sa padagos na pag-aalburoto kaini.
Segun ki Camalig Municipal Police Station Chief of Police Police Major Karlo Dy, sa intrevista kan Bombo Radyo Legazpi, kabale sa saindang pigbabantayan 24/7 an Border Control Point asin duwang evacuation centers nganing mamantinir an paz y orden kan nasabing banwaan.
Naka-deploy an nasa 21 personahes sa kada Border Control Point asin siyam na deployed personnel sa mga evacution centers afuera pa sa mga naka-deploy na policewomen digdi.
Sa presente wara pa man sindang nairerehistrong anumang untoward incident durante kan saindang mga pagbabantay.
Mientrastanto, naghagad man nin despensa an opisyal sa mga residente sa dae pagpapalaog sa 6-kilometer permanent danger zone huli sa ipigpaotob ninda an no man’s land sa lugar dara kan posibleng huma kan aktibidad kan bulkang Mayon.
