LEGAZPI CITY – Naka-alerto an Lokal na Gobierno kan Camalig, Albay sa posibleng huma na kawsa kan padagos na pag-aalburuto kan Bulkan Mayon asin sa epekto kan Bagyong Ada.
Sa intrevista kan Bombo Radyo Legazpi ki Mayor Caloy Baldo, nagmamawot ini na dae na magkusog an pag-uuran na pigdadara kan maraot na panahon sa ibong kan naka-andam sinda dapit digdi.
Automatic man suboot na magsasagibo nin evacuation efforts an saindang mga Barangay enkaso padiit-diit nang nagtataas an tubig partikularmente na an mga nasa hababang lugar.
Nakabantay man sinda sa mga residenteng naka-istar harani sa salog o river channels huli sa posibilidad na magbulos an lahar siring man an mga naka-istar sa 7KM extended danger zone kan Bulkan.
Segun pa sa opisyal na saro sa pigkokonsidera nindang hazard iyo an magkaigwa nin makusog na pagtuga an bulkan mantang pigrarapado kan Bagyo an rehiyon na mapadifisil sa saindang disaster response.
Paglinaw niya man na nagkondusir na sinda nin pag-oolay kabale an mga Punong Barangay sa saindang banwaan nganing diskutiron an mga posibleng scenario asin dapat gibuhon sa mga arug kaining pangyayari.
Pagsyerto man ni Baldo na may nakadesignar nang mga evacuation centers sa mga Barangay na pwedesir maapektaran enkaso maglala an sitwasyon sa saindang lugar.
