LEGAZPI CITY – Ipigkokonsiderar na dakulang blessing para sa mga nagtitios na kahimanwa sa papaabot na kapistahan kan Parish of Padre Pio sa Brgy. Rawis sa ciudad kan Legazpi an dugang na bulong asin vitamins na ipig-abot kan Bombo Radyo Philippines.
Saro an nasabing simbahan sa mga napili bilang beneficiario kan mga sobrang bulong na hale sa ikinondusir na matrayumpong Bombo Medico 2019 na taunang medical, dental asin opthal mission kan nakalihis na Hulyo 14.
Sa intrevista kan Bombo Radyo Legazpi ki Parish Acting Secretary Renato Rex, dakulang pasasalamat suboot sa network urog na gagamiton man an mga bulong asin bitamina sa nakatalaang medical mission sa Setyembre 15 hasta 17.
An aktibidad an kakabit kan enot na anibersaryo kan simbahan bilang parokya na obhetong mapaabutan nin tabang an mga parishioners sa Brgy. Tamaoyan, Dita, Pawa, San Joaquin, Rawis, Bagong Pook asin Palading.
Timely man suboot na siring kan pagigin bistong parabulong ni Padre Pio, nag-abot man an bulong na maibabariwas sa mga mawot na magrahay sa saindang pigmamating helang.
