Nagpahayag an Bangko Sentral ng Pilipinas (BSP) na nagretiro o nagtangkas nin kabilugang P685.6 bilyong kantidad nin mga salapi kan 2024 nin huli ta bako na ini angkop para sa presenteng sirkulasyon.
Segun kay BSP Assistant Governor Rosabel Guerrero, nagbaba ini nin 11.3% kumpara kan 2023, na pig-konekta sa mas mahiwas na paggamit nin P1,000 polymer banknote na may mas halawig na buhay.
Pigpunan an pag-isyu kan polymer banknotes kan 2022, na midbid sa pagigin mas matibay asin mas haloy an itatagal kumpara sa mga papel na salapi.
Afuera digdi, nagpaluwas man an BSP kan Disyembre 2024 nin mga polymer na bersyon kan P500, P100, asin P50 na nagpapahiling nin mga ladawan kan mga katutubong hayop asin disenyo kan lokal na habi.
Sa ibong kan pagbaba nin mga niretirong salapi, naghalangkaw man nin 59.1% an mga nawasak na barya, na uminabot sa 157.8 metriko tonelada kan 2024.
