LEGAZPI CITY-Nilimitahan na kan Bangko Sentral ng Pilipinas (BSP) sa kabangang milyon an kantidad kan kawarta na pwedisir mai-withdraw sa sarong transaksiyon.
Katakod ini kan nagpapadagos na imbestigasyon sa suboot anomalya sa flood control projects kun sain naibuyagyag na pigpapaagi sa suboot “kickbacks” hale sa nasabing mga proyekto sa mga bangko.
Ipigpapaotob man kan Anti-Money Laundering Council (AMLC) an freeze order sa 135 bank accounts asin 27 insurance policies.
Kasunod kaini, pigsugo ni BSP Governor Eli Remolona Jr. an mga financial institutions na pinamamayuhan kan central bank ngani maipaotob kan enhanced due diligence (EDD) sa darakulang kantidad kan cash payments asin transactions.
Ipigsagibo an nasabing direktiba sa bisa kan Circular No. 1218, series of 2025 ngani mapugulan na magamit an mga kwarta sa iligal na mga transaksyon asin mabusol an integridad kan sistema sa salapi.
Ipisugo man sa mga bangko asin iba pang financial institutions na i-adopt an kaukulang polisiya asin procedures laban sa money laundering asin counter terrorism ngani istriktong maipaotob an limitasyon asin restriksiyon sa transaksiyon kan mga cash.
Enkaso na maglagpas sa naktakdang threshold o limitasyon,segun sa ahesnya na dapat ining isairarom sa kaukulang enhanced due diligence measures ngani posibleng payagan kan financial institutions an payout kan cash na labi sa kabangang milyon o katumbas kaini sa foreign currency, sa kondisyon na makapagsumiter an customer nin dugang na identification information o katibayan kan lehitimong obheto sa negosyo o transaksiyon.
Magigin epektibo an nasabing direktiba, sa 15 aldaw makalihis na mairehistro sa Official Gazette o pahayagan sa pangkalahatang sirkulasyon.
