LEGAZPI CITY – Salbado na naidalagan sa ospital kan Coast Guard Substation Bulan an sarong 62-anyos na turista na nakaeksperensya nin septic shock mantang lunad kan International Cruise Ship na MV Diamond Princess sa parte kan kadagatan kan Bulan.
Sa intrevista kan Bombo Radyo Legazpi ki PO2 Jeffrey Baria, Coast Guard Commander, Coast Guard Substation Bulan, nakaresibe sinda nin distress call hale sa nasabing barko na igwa ki nangangaipo ki atensyong medikal.
Tulos man na nakipagkoordinar an mga personahes kan Coast Guard Substation Bulan sa iba pang mga ahensya tanganing matabangan sinda na salbado na maibaba an pasyente sa nasabing barko.
Napag-araman na sarong British national an pasyente asin bigla na sana suboot na dae nakahangos asin nakamati nin panluluya.
Segun ki Baria, pasiring sa Alotau, Papua New Guinea an barko lunad an labi sa 2,000 na mga turista asin 1,053 na mga tripulante.
Mientras tanto, bandang alas-6 kasubanggi nagpadagos na sa pagbyahe an nasabing cruise ship makalihis na masiguro na salbado na an pasahero na nangaipo nin atensyong medikal.
