Nasa kustodiya na kan Bureau of Customs an 28 luxury vehicles na pagsasadiri kan pamilya Discaya.
Susog sa ahensya na isinurender kan Discaya an kadugangang 16 na mga behikulo kan aldaw nin Huwebes, Setyembre 4.
Ini afuera pa sa naenot na 12 na mga behikulo na nakalista sa search warrant na isinagibo kan Setyembre 2 sa St. Gerrard Construction General Contractor & Development Corporation sa compound sa ciudad kan Pasig.
Nagsairarom an mga behikulo sa sealing asin documentation asin ini an mahigot na pigbantayan kan mga personalidad kan Bureau of Customs mantang pigberepika an mga importation records asin assessment of duties and taxes.
Enot nang itinuga kan mga Discayas sa hearing kan Senado na igwa sindang 28 luxury cars mantang sa sarong vlog sinabi nindang maabot sa 40 an numero kaini.
Magigiromdomang pig-imbestigaran ngunyan an pamilya Discaya makalihis na makakua nin flood control projects na nagkakantidad nin P31 bilyon puon 2022 sagkod 2025.
