LEGAZPI CITY-Haros nagdoble na an volume kan mga pasahero asin mga kargamento an nag-aagi sa Matnog Port sa provincia kan Sorsogon puon pa kan Domingo, Abril 13, 2025.
Segun ki Philippine Ports Authority Bicol Media Relations Officer Achilles Galindes, sa intrevista kan Bombo Radyo Legazpi, na naooserbaran na an pagpiot sa nasambitang pantalan siring man an pagpila nin mga behikulo sa tinampo partikularmente na an mga truck.
Sa ibong kaini, pig-aasigurar man kan mga shipping companies kan mga barko na padagos an saindang biyahe ngani na masierto na makapasiring sa saindang padudumanan an mga biyahero.
Piglalaomang mas madakol pa an mga biyahero sa mga masunod na aldaw magin sa ibang pantalan siring kan Tabaco asin Pio Duran.
Huli digdi, nakahanda an saindang ahensya, stakeholders, asin mga pantalan sa padagos na pag-abot kan mga pasahero na mapasiring sa manlaen-laeng parte kan nacion.
Mientrastanto, nagpagiromdom man ini sa publiko na mabiyahe na magin maingat, ihanda nin maray an mga lunadan,magdara nin bastanteng suplay nin pagkaon, tubig, asin bulong.
Nag-abiso man ini na pag-abot sa mga pantalan magigin mahigot an pagpapaotob nin seguridad kan mga kapulisan, security personnel, asin iba pang partner agencies.
