LEGAZPI CITY— Dae nin pundo an preparasyon ngunyan kan mga atleta hale sa Bicol region, sarong aldaw antes an opisyal na pagbubukas kan Palarong Pambansa 2017.
Segun ki Kevin Arroco, Project Development Officer 2 kan Department of Education Regional Office 5, nagin dakulang bentahe man para sa delegado kan rehiyon an haraning billeting center sa mga playing venues kun kaya madaling makapagpa-reserve asin makapagpraktis an mga ini.
Sienerto man kan opisyal na pirming naka-antabay an medical team ngani na magtao nin asistensya kun en kaso magkaigwa nin injury an players.
Dugang pa kan opisyal, mahihiling an preparasyon kan probinsya kan Antique na iyo an host region para sa nasambitan na sporting event kun sain igwa nin mga bagong playing venues huli na man sa mandato digdi na maotob an international standards.
Mientrastanto, ipinahayag ni Arroco na pinaglalaoman an pag-abot ni Presidente Rodrigo Duterte sa Abril 23 para sa opening kan Palarong Pambansa.
