LEGAZPI CITY- Naghayag nin suporta an Police Regional Office 5 (PRO5) sa Philippine Drug Enforcement Agency (PDEA) na natawanan kan responsibilidad bilang lead agency sa giyera kontra sa iligal na droga.
Sa intrevista kan Bombo Radyo Legazpi ki PRO5 spokesperson S/Insp. Maria Luisa Calubaquib, ipighayag kaini na PDEA an igwang pinaka-lead role susog sa Republic Act 9165 o Comprehensive Dangerous Drugs Act of 2002 mientras na nagsunod sana an pulisya sa direktiba ni Presidente Rodrigo Duterte. Pag-eksplikar pa kaini na susog sa mga responsibilidad kan PNP, seguridad an mayor na pinakatutok ninda.
Naglalaom man si Calubaquib para sa trayumpo kan mga operasyon kan PDEA agents mientas na ipig-ofrecir an tabang en kaso kaipuhanon kan mga ini.
Ipigkokonsiderar man ni Calubaquib na bentahe an nasabing desisyon tangarig na urog pang matawanan nin atensyon an linya kan saindang trabaho magin an ipigsasagibong internal cleansing. Kaibanan kaya sa mga plano na tutukan an kampanya sa pagdakop sa mga riding in-tandem suspects.
Ipigdepensar man kan opisyal si PD/Gen. Ronald dela Rosa sa nagin pahayag na posibleng an pamamayo kan PNP sa war on drugs an nagkawsa nin pagbaba sa rating kan presidente.
Segun ki Calubaquib, dae sinda nagkukulang sa pagdakop kan mga personalidad na imbwelto sa transaksyon kan iligal na droga.
Promesa pa kaini na magpapadagos man giraray an pagsisirbe kan mga ini sa tawo asin pagpapaotob kan due process sa mga operasyon kasabay kan pgtataong-duon na warang nagi-eksister na extrajudicial killings sa Pilipinas.
