LEGAZPI CITY – Diit sana suboot an nanotisyaran na mga campaign posters na iligal na ikinabit sa nagkapirang lugar sa rehiyon alagad tinawang-duon kan Commission on Elections (COMELEC) na mahigot man giraray na babantayan an mga kandidato.
Katakod kaini, ipighayag ni COMELEC Bicol Regional Elections Supervisor Atty. Noli Pipo sa intrevista kan Bombo Radyo Legazpi na makikisumaro sa sabay-sabay na Operation Baklas kan mga campaign materials kan national candidates.
Pigrereconocer man suboot kan komisyon an importanteng papel kan pulisya asin Department of Public Works and Highways (DPWH) sa operasyon urog na sa orolay sa seguridad asin ekipaheng gagamiton sa pagbaklas.
Mientras tanto, nilinaw kan opisyal na wara pa man na magiginibo sa mga nagdadalagan sa local positions na oversized an posters o kaya bako sa designated na mga lugar nakakabit.
Maikokonsiderar sana kayang kandidato sa pirilian an nasabing mga persona kun opisyal naman na nagpuon an kampanya kan mga ini o sa maabot na Marso 29.
Mientras tanto, liwat na nagpagirumdom an opisyal na ipigbabawal an pagkakabit kan mga campaign posters sa puon nin kahoy, mga poste, mga ahensya kan gobierno asin iba pang imprastraktura na pagsasadiri kan gobierno.
