LEGAZPI CITY – Padagos an pagbabarewas nin tabang kan Bureau of Fire Protection sa mga nadanyaran kan mahiwasang kasulo na nangyari sa banwaan kan Pilar, Sorsogon.
Magigirumduman nangapodan nin tabang an nadanyarang mga pamilya sa Barangay Banuyo kan kaparehong banwaan asin provincia makalihis na matumpos nin kalayo an saindang mga kaharongan.
Segun ki BFP Pilar Municipal Fire Marshal Fire Senior Inspector Liezel Lo-Batilo sa intrevista kan Bombo Radyo Legazpi na nagkaigwa na sinda nin joint feeding program na pinangenotan kan mga kababaihan kan mga BFP stations sa enterong provincia.
Gabos suboot na nagtetenir ngonian sa evacuation center an natawan ninda nin mga foodpacks, mga bado asin mga kawatan sa mga kaakian.
Sa obserbasyon niya man na warang patod suboot an pag-abot nin tabang sa mga nasuluan na gikan sa manlain-laing ahensya asin organisasyon.
Pigtaram pa kaini na nagtetenir na under investigation pa an saindang hepatura sa rason kan nangyaring kasulo asin an kabilugang danyos na pigkawsa kaini.
base man sa saindang inisyal na datos iyo an uminabot na sa 175 families an nasuluan kan saindang kaharongan o katampad nin labi 700 na indibidwal an naapektaran.
Pangapodan ni Batilo sa publiko na mag doble ingat urog na kun gibo sa light materials an saindang mga kaharongan huli ta pwedesir maglakop an sarong kalayo sa laog sana nin 30 segundos asin pirming pagrumdumon an mapadapit sa fire safety para sa saindang kaligtasan.
