LEGAZPI CITY—Pangapodan ngonian kan Camalig Fire Station sa gobierno na mag-alokar nin pondo para sa mga heavy equipment na magagamit sa pagresponde sa aksidente orog na kun imbuelto an magagabat na behikulo.
Ini makalihis an nangyaring banggaan nin pampasaherong van asin trailer truck sa Barangay Libod, Camalig, Albay kun saen 11 an binawian nin buhay asin tolo an nairido.
Segun ki Camalig Fire Station Acting Municipal Fire Senior Inspector Warren M. Orendain, sa intrevista kan Bombo Radyo Legazpi, nagin dificil suboot an saindang ginibong operasyon huli sa magabat an truck na may kargang mag ekipahe sa peryahan asin nasa tolong metros an rarom kan pinagbanggaan kaini.
Kulang suboot an saindang mga ekipaheng pang-angat kun siring na magagabat na truck an saindang rerespondehan.
Dugang kan opisyal na nawaran suboot nin preno an truck kaya nagduro-diretso ini hasta sa mabangga an van asin mahulog sa ini sa may bangin.
May nagpasiring man na mga persona sa insidente nganing aramon kun sainda ining kapamilya alagad segun ki Orendain na dae na ninda mabisto an mga ini huli sa nayupi na an nasambitang van.
Dae man mababa sa 100 na personnel an nagresponde sa insidente kabale an Municipal Disaster Risk Reduction and Management Office, Bureau of Fire Protection, Philippine National Police, asin iba pang ahensya kan gobierno.
Mientrastanto, nagpagiromdom an opisyal na pirmehang ipag-check an mga behikulo asin an pag-obserbar sa BLOWBAGETS (Battery, Lights, Oil, Water, Brake, Air, Gas, Engine, Tire, and Self).
