LEGAZPI CITY – Nagpagirumdom nin amay an Bureau of Fire Protection Bicol sa publiko dapit sa pagbakal nin Christmas lights pirang bulan bago an pasko.
Sa intrevista kan Bombo Radyo Legazpi sa tagapagtaram kan BFP Bicol na si Fire Inspector Jeffrey Baldo, sinabi kaini na dapat puminasar an mga produkto arug kan mga Christmas lights sa Bureau of Philippine Standards.
Segun pa sa opisyal, dapat na igwa nin ICC mark stickers an mga produkto asin hilingon an mga wirings kaini kun igwang raot.
Abiso pa ni Baldo na ibitaran an pagsaksak sa sarong outlet asin hilingon an instructions sa kahon kaini kun pirang oras sana dapat an plugging time tangarig dae mag overheat na pwedesir magkawsa nin kasulo.
Sa kabilugan, wara pa man sindang nadakop na mga paratienda nin mga Christmas lights na nagbabalgar sa community standards.
