LEGAZPI CITY – Nahilingan kan Bureau of Fisheries and Aquatic Resources nin pagtaas an fish production sa rehiyon Bicol ngonian na taon.
Segun ki BFAR region 5 Fisheries Production and Support Services Division Chief Atty. Nilo Consuelo sa intrevista kan Bombo Radyo Legazpi na kun ikokompara an second qaurter kan 2024 sa second quarter kan 2025 an nagkaigwa ini nin 2.54% na paghalangakaw basado man sa datos kan Philippine Statistics Authority.
Alagad sa ibong kaini an nanonataran an pagbaba kan fisheries production sa mga provincia kan Sorsogon asin Camarines provinces na nagkaigwa nin negative percentage na pagbaba mantang an Catanduanes asin Masbate an labing nagtaas sa porsyento kan pruduksyon.
Pwedesir suboot na naghalangkaw sa Catanduanes asin Masbate huli ta nagpapabor sa nasabing mga provincia an ipigtatao ninda na intervention sa estado kan kapalibutan asin klima sa saindang kadagatan.
Pigtaram pa kan opisyal na may mga lugar man na naapektaran kan ipigpaotob nindang polisiya arug kan growing season, no fish zone, asin iba pang pighahagad na mga rekisitos kan saindang ofisina.
Nalilimita man an saindang pagsisira tuyong nagkakaigwa nin mga raot nin panahon na nagreresulta sa pagpapa-otob nin mga gale warning huli ta mas importante an buhay kan mga parasisira kompara sa makukuwa nindang sira.
Padagos man an saindang technology demonstration sa lado kan aquaculture nganing magdakol an mga magamit kan mga teknolohiya na may kinaaraman sa tilapia, bangus, asin hito bussiness.
Nagbabarewas man sinda nin mga fish fingerlings nganing makapagbalik sa industriya nin aquaculture an mga bicolanong naapektaran an saindang siraan kan mga nakaaging bagyo asin kalamidad.
Sa presente, naghahanda na sinda Consuelo para sa papaabot na “Ber” months na komon na naghahalangkaw an demand kan sira sa Pilipinas.
