LEGAZPI CITY- Nakaresibe nin manlaen-laen na reaksyon an suboot biglaan na paniniket kan BCERG sa mga tricycle drivers katakod kan ordinansa kan Legazpi City na No Entering the National Road Policy.
Sigon sa mga nagreklamong drayber, biglaan an pag-implementar kan nasambitan na ordinansa asin dae sinda naimpormaran dapit digdi.
Alagad nanindogan an pamayo kan BCERG na si Kagawad Bong Samar na imposible an pigsasabi kan mga ini huli ta kan Enero, nagpaapod suboot sinda nin hearing sa gabos na presidente kan lambang parada ngani na mag-abiso mapadapit sa ii-implementar na bagong ordinansa sa syudad.
Dugang pa ni Samar, obligasyon na kan mga ipinaapod na presidente na impormaran an saindang mga sakop na drivers.
Duda kan opisyal, pigigibo sana ining rason ngani na makalusot sa mga apprehending officers huli ta igwa na man suboot nin mga nakabugtak na warning signs sa tinampo.
Nagtutubod si Samar na nagin kampante an mga tricycle drivers na dae sinda madadakop huli na man sa paramientras na pagpundo sa operasyon kan Public Security Office (PSO.)
Nagbubuta-butahan sana suboot an mga ini sa mga abisong haloy nang nahihiling sa Rizal St.
P3,000 an penalidad na isinangat kan BCERG sa mga naticketan na tricycle huli sa pagbalgar sa nasambitan na ordinansa.
