LEGAZPI CITY — Isinuhestiyon ni AKO-Bicol Party-list Rep. Rodel Batocabe na magkaigwa na nin sports summit kasunod kan pagpalyar kan rehiyong Bicol na makalaog sa top 10 kan katatapos pa sanang Palarong Pambansa 2017.
Segun ki Batocabe, maray na magkaigwa na nin sports summit ngane na tukaron an direksyon kan Bicol sports asin mag-institutionalize nin mga programa na pwedesir ipautob kan mga local government units.
Kaipuhan suboot na maging panghaluyan, masustenir asin sulit an mga programang iimplementar.
Ipigheras pa kan kongresista na nakapag-producir na an rehiyon nin kadakol na sports geniuses asin saro na digdi an Filipino Olympic medalist na si Miguel White na nakaguno nin bronze medal kan 1936 Summer Olympics na pigkondusir sa Berlin, Germany kun saen naglaban siya sa 400 meter hurdles.
Sinabi pa ni Batocabe na kaipuhan sanang magpokus asin suportaran an sustainable grassroots sports program.
Tinawang duon kaini na nagpa-practice sana kaya an mga atleta tuyong may kompetisyon.
Nagtapos an Bicol region sa ika-11 pwesto ngunyan na taon na iyo mang nakuang pwesto kan nakalihis na taon.
Nakaguno man ngunyan an team Bicol nin 9 na bulawang medalya kumpara sa walo kan 2016.
