LEGAZPI CITY – Nakamonitor an Municipal Disaster Risk Reduction and Management Office kan Baras, Catanduanes manungod sa posibleng epekto ni Tropical depression Crising.
Alagad paglinaw ni MDRRMO Baras Head Engr. Khalil Tapia sa intrevista kan Bombo Radyo Legazpi na maski suspendido na an klase sa saindang lugar an dae man suspendido an mga laog kan mga obrero mantang nag-olay na man an mga principal asin kan saindang education supervisor kun dae na man papalaugon an saindang mga paratukdo.
Sagkod ngonian na aldaw suboot an wara sindang nairehistrong insidente na kinaipuhan nindang respondehan.
Pinag-iingat niya man an mga motorista huli ta maski warang binahang kakalsadahan sa saindang lugar alagad nagtetenir ining mahalnas kun sain pwedesir ining magin kawsa nin aksidente.
Segun pa sa opisyal na nakipagtabangan na man sinda sa mga barangay official na magin rigmat sa palibot asin kusa nang mag-ebakwar kun kinakaipuhanan.
Presente mang nakabandera sa saindang lugar an no sail policy para sa gabos na klase nin bangka para man sa kaligtasan kan mga parasisira.
Nagigin angat man sa sainda an paghanap nin mga warehouse nganing pagtambakan kan mga food and non-food items nganing makapag-preposition na sinda nin relief supplies.
Pagirumdom man ni Tapia sa publiko na magin alerto sa posibleng pagrasay nin daga, pagbabaha, rockslide, mudflow asin tulos na makipagkoordinar sa saindang ofisina enkaso may mangyaring dae piglalaoman na inisdente nganing tulos ninda ining marespondehan.
