LEGAZPI CITY — Naisumite na suboot kan konseho kan Barangay Salvacion sa banwaan kan Daraga an saindang request na ideklarar ng drug cleared an saindang lugar.
Segun ki Kapitan Justo Lumaban, base sa naging obserbasyon kan konseho kan barangay asin Barangay Anti-Drug Clearing Operation (BADAC) negatibo na an lugar sa ipigbabawal na bulong.
Nareparo kaya suboot ninda na dakula na an naging kaibahan kan lugar kun ikukumparar kan nakalihis na mga taon.
Nakapalaman sa isinumiteng surat ni Lumaban an kahagadan na matawang linaw na klarado na an Barangay Salvacion sa droga.
Alagad dae naman naiimbwelto an lugar sa droga, padagos man suboot liwat an saindang mahigot na kampanya kontra digdi.
Apwera pa sa iligal na droga, nagmomonitor naman an opisyales kan barangay dapit sa illegal gambling.
Inaprubaran naman suboot sa saindang naging sesyon na magkondusir nin paglilibot an mga tanod ngane na mag-monitor kan anumang mga iligal na aktibidad na mangyayari sa barangay.
Sa ngunyan, apwera sa pagkampanya kontra droga asin pagsusugal, plano man kan lugar na magkaigwa nin seminar dapit sa BADAC, paz y orden (peace and order), disaster preparedness asin iba pa ngane na matawan nin kaaraman an saindang namamanwa.
