LEGAZPI CITY – Nangapodan an toxic watchdog group na Ban Toxic sa publiko na imantenir an kalinigan sa mga simbahan asin pasyaran ngonian na semana santa.
Segun ki BAN Toxics Campaigner Thony Dizon sa intrevista kan Bombo Radyo Legazpi na kapansin-pansin man na sa nakalihis na mga taon na pag-oobserba kan holy week an padagos man na nagkakalat na mga basura.
Nagpaluwas sinda nin pagirumdom huli ta an pagrumdom sa mahal na araw an pagrumdom man nganing maproptehiran an kapalibutan.
Dae na suboot nawawara sa mga tawo an pagtapok nin mga basura kun sain huli ta warang presenteng ley o ordinansa sa mga local government unit mapadapit sa pagtatapok asin pagsegregate nin tama kan mga basura.
Pigtaram pa kaini na itaong respeto na sana sa mga simbahan an pagpurot kan saindang mga basura asin dae na paghalaton na kolektahon kan mga street sweeper huli ta sa siring kaining paagi an napapahiling an debosyon kan sarong indibidwal.
Rumdumon suboot kan publiko na an simbahan an sagradong lugar nganing magpangadyi kun kaya dae paggibuhon na tambakan asin tapukan kan saindang mga basura.
Sinabay man ninda sa saindang pagirumdom an pagmamantenir kan kalinigan sa saindang dudumanan o papasyaran arug na sana kan mga nature park asin beach.
Pig-enganyar ni Dizon an mga gobierno lokal na magbugtak nin mga patakaran nganing masabutan kan publiko an pagmamantenir kan kalinigan sa mga simbahan.
