LEGAZPI CITY – Inihayag kan Bureau of Fisheries and Aquatic Resources (BFAR) Bicol na bako na bago an sightings asin pagka-stranded kan mga balyena sa nagkapirang lugar kan provincia kan Masbate.
Ini an makalihis na mahiling kan mga residente an sarong balyenang na-stranded sa dagat na parte kan Pinamarbuhan sa banwaan kan Mobo kasuodma nin udto.
Sa intrevista kan Bombo Radyo Legazpi ki BFAR Bicol spokesperson Rowena Briones, enot an nagkaigwa muna nin sightings kan sperm whale sa Buntod Reef asin inalaw pa ini kan mga parasira pasiring sa mas hararom na parte kan dagat.
Alagad nagpasiring man giraray sa hababaw hasta sa makasadsad sa baybayon kun sain pigtarabangan kan nagkapirang residente na makahali.
Nahilingan man an balyena nin mga lugad na posibleng nakatama sa pagsadsad sa hababaw na parte kan dagat.
Tulos man na nakipagkoordinar an opisina sa Provincial Veterinary Office para sa pag-asister kan nasabing sperm whale.
Segun ki Briones igwa na nin mga trained responders an opisina para sa arog kaini na mga insidente.
