LEGAZPI CITY- Nagkapirmahan na nin memorandum of agreement (MOA) an provincial government of Albay asin an Department of Social Welfare Development (DSWD) Bicol katakod kan pag-establisyar nin Bahay-Pagasa na sarong 24-hour child-caring institution para sa mga jovenes na nakakomiter nin krimen partikularmente an mga babayi.
Taong 2016 kan kumbinsiron kan DSWD Bicol asin Regional Juvenile Justice and Welfare Committee (RJJWC) an mga lokal na gobyerno sa rehiyon na magkaigwa kan nasambitan na pasilidad susog sa Republic Act (RA) 9344 na inamyendaran kan RA 10630 o an mandatong pagkakaigwa nin Bahay-Pagasa sa gabos na probinsya asin highly-urbanized na syudad.
Sa intribista ki Arnel Garcia, Regional Director kan DSWD Bicol, sinabi kaini na mismong pondo kan Albay an gagamiton sa proyekto asin bako gikan sa national government.
Inomaw ni Garcia si Albay Governor Al Francis Bichara huli ta magayon suboot na ehemplo an lakdang na ini kan opisyal.
Enot nang inirekomendar na gibuhon na prayoridad sa pag-establisyar nin Bahay-Pagasa an mga probinsya kan Albay, Camarines Sur asin Camarines Norte huli sa pagkakaigwa kan mga ini nin halangkaw na numero nin ‘children in conflict with the law’ (CICL.)
