Sinangatan na nin kaso an sarong padre de pamilya makalihis na brutal niyang gadanon an saiyang bados na agom sa Brgy. San Miguel, Norala, South Cotabato.
Binisto an biktima na si alyas Fe, 36 anyos, mantang an suspek iyo an saiyang agom na si alyas Larry, 42 anyos asin parehong residente kan nasabing lugar.
Segun kay kapitan Ryan Cabrera Januto kan Brgy. San Miguel, hale pa sana sa pag-uuring an suspechado kan mag-iriwal sindang mag-agom, huli suboot sa selos.
Mantang nagluluto si Fe, nagkua nin “panabas” si Larry asin daing herak na ginilitan sa liog an biktima.
Pagkatapos kan krimen, nagporbar si Larry na maghugot asin sinaksak man an saiyang sadiri sa liog.
Sa ibong kaini, buhay man giraray ini kan maabotan kan mga nagrespondeng otoridad na tulos man na dinara sa ospital para sa medikal na atensyon.
Sa kamondoan, an omboy na dara ni Fe dai man naligtas.
Grabe an trauma kan saindang 7 anyos na aking lalaki na nakaheling kan karumal-dumal na krimen asin tulos na naghagad nin tabang sa mga awtoridad.
Sa ngonian, pigbabantayan kan mga otoridad an suspek sa ospital mantang pighahanda an magkakanigong kasong isasangat kontra digdi.
Pagsierto kan mga aki kan biktima na ipaglalaban ninda an hustisya para sa saindang ina.
Nangapudan si Kapitan Januto sa publiko na tulos na isumbong sa mga awtoridad an anuman na klase nin domestic abuse ngani na maibitaran an mga siring na trahedya.
Pig-enganyar man kaini an mga mag-agom na resolberan an saindang mga iriwal sa tama asin matoninong na paagi.
