LEGAZPI CITY- (Update) Pig-iimbestigaran na ngonian kan mga otoridad kun saen nakua kan retiradong Bureau of Jail Management and Penology (BJMP) personnel an ginamit na badil sa paghuhugot.
Enot nang naibareta an pagbadil sa sadiri ni Danilo Severino, 54-anyos sa residencia kaini sa Purok 2, Brgy. Kimantong, Daraga, Albay.
Sa intrevista kan Bombo Radyo Legazpi ki P/Supt. El Cid Roldan, hepe kan Daraga Municipal Police, nagluluwas kaya na wara sa record an ginamit kaining badil sa hepatura mientras na pigbeberipikar naman sa Camp Gen. Simeon Ola.
Dugang pa ni Roldan na magayon na klase an badil na kinumpirmar na Jericho .9mm na gibo pa sa Israel asin regular na pigagamit sa disyerto.
Solamenteng an empty shell sana man suboot an narekober sa pinangyarihan kan insidente mientras na wara naman na iba pang bala na nakua.
Mientras tanto, pigtutubudan na an pigmamateng helang an rason kan paghuhugot kan dating personahe kan BJMP makalihis na maaraman na taong 2013 pa kan ma-stroke ini kaya amay man na nagretiro.
