Nakikipag koordinar ngunyan an mga law enforcement agencies kan Pilipinas sa saindang Vietnamese counterparts makalihis mai-report na namataan sa Vietnam an puganteng businessman na si Charlie Atong Ang.
Marurumduman na si Ang an suspek sa kaso kan mga nawawarang sabungero.
Segun ki Department of Interior and Local Government Secretary Jonvic Remulla na nagigibo na nin mga diplomatic efforts an gobierno ngani na makipag olay sa mga otoridad kan Vietnam ngani na mahiling an saindang immigration record asin masierto kun talagang nasa nacion an nasabing negosyante.
Sinabi kan opisyal na marikas na maaaraman an resulta asin kumpirmasyon kun nasa Vietnam si Ang huli sa mga nagpapadagos na pakikipag koordinar ni Philippine National Police (PNP) Chief PGen. Jose Melencio Nartatez Jr. sa mga otoridad kan nasabing nacion.
Mientras tanto, pighihiling man an posibilidad na nakaluwas sa Pilipinas si Ang sa paagi kan backdoor sa Mindanao pasiring sa Malaysia nagkapirang semana antes magluwas an warrant of arrests kontra saiya.
Sa presente nakikipag koordinar na man an DILG asin iba pang mga ahensya para sa pag-isyu nin red notice kontra ki Ang para sa tulos na pagkaka arestar sa pugante.
