LEGAZPI CITY- Maginibong na an mga pig-aatendiran na meeting kan Police Regional Office 5 (PRO5) katakod kan preparasyon sa paglaog kan election period para sa taong 2019.
Ipighayag ni Bicol PNP spokesperson PC/Insp. Maria Luisa Calubaquib sa intrevista kan Bombo Radyo Legazpi na binalikan an assessment kan nakaaging taon sa mga kandidatong naka-kategorya bilang vulnerable o may “very high security threat level” na represented kan kada provincia.
Dugang pa ni Calubaquib na pighihiling na man an posibilidad sa pag-hire kan mga private armed groups (PAGs) o gun for hire kan nagkapirang indibidwal tangarig na mahale an political opponent.
Kaibanan pa sa mga pigtututukan an mga pangaran kan mga kandidatong miembro kan drug syndicates, mga nagsusuporta sa drug groups magin an mga naghahagad nin tabang sa mga miembro kan New People’s Army (NPA).
Piglalaoman na man an mga masunod pang meeting sa pagdiskutir kan gabos na mga lugar na pwedeng ikaag sa election watchlist areas na susog sa dakol na aspetong pig-iimbestihgaran mantang isasairarom pa sa final assessments.
Pagtataong-duon pa ni Calubaquib na parte sana an nasabing mga hakbang tangarig masierto ang salbadong pirilian para sa mga botante asin mga kandidato sa manlain-lain na posisyon.
