LEGAZPI CITY – Pigpapahanda na kan Albay Public Safety and Emergency Management Office (APSEMO) an mga eskwelahan sa pagsuspinder kan klase sa gabos na lebel ngonian na hapon.
Katakod kaini, nakatalaang magbaba nin abiso an Provincial Disaster Risk Reduction and Management Council (PDRRMC) na masirbeng giya sa mga paratukdo, magurang asin kaakian.
Sa intrevista kan Bombo Radyo Legazpi ki APSEMO chief Dr. Cedric Daep, piglalaoman an makusog na pag-uran sa Albay ngonian na hapon partikular na sa tercer distrito, susog sa forecast kan PAGASA weather bureau.
Pigpapakusog suboot kan namamatiang raot kan panahon (Bagyong Falcon) an paros na Habagat sa may parte kan provincia na nagdadara nin mga pag-uran huli sa marikas na pagkabilog kan mga cloud formation urog na sa west coast.
Pigpapaibitar man ni Daep sa paglayag an mga saradit na bangka makalihis an ibinanderang gale warning huli sa darakulang ukol sa kadagatan.
Sa mga lugar na tipikal na pigbabaha kun mauran, pigpapalikay an mga hararaning residente sa flashfloods asin pagbalyo sa mga hirarom na salog.
Mientras tanto, alas-11:00 nin aga iluluwas an opisyal na kopya kan advisory para sa pagsuspinde kan klase.
