LEGAZPI CITY- Nagdistribwir an Albay Provincial Agriculture Office o APAO nin labi sa 100 packs nin manlain-lain na klase nin binhi, mga pananom na kahoy asin tulong set kan mga binhi nin gulayon sa Barangay Bulusan Libon Albay.
Sa intervita kan Bombo Radyo Legazpi kay Daryll John Buenconsejo an Assistant Provincial Agriculturist kan Albay Provincial Agriculture Office, obheto kaini na matabangan an mga paraoma na apektado kan panrarapado ni Bagyong Kristine asin iba pang weather disturbances na kun sain kadakol na mga paraoma an nalubog sa baha an saindang mga pananom sa naunambitang banwaan.
Labi man an kaogmahan kan mga paraoma sa Libon huli na man sa dakulang tabang ini para sa pandagdag sa saindang kabuhayan asin maging sa saindang pamilya.
Mientras tanto naging katabang man kan ahensya an Youth Ambassadors of Albay para maisakatuparan an naunambitang asistensya para sa mga paraoma sa naunambitang barangay sa Libon.
Inasigurar man kan opisyal na igwa pang mga masunod na asistensya para sa mga paraoma na dae pa natatawanan nin mga tabang hale sa local na gobyerno kan Albay.
Pinag-iinganyar man kan opisyal an mga paraoma na magparehistro na sa Albay Provincial Agriculture office para madaling makaabot an mga tabang hale sa gobyerno. VC. Daryll John Buenconsejo, Assistant Provincial Agriculturist, Albay Provincial Agriculture office.
