LEGAZPI CITY – Balik na sa normal an sitwasyon sa banwaan kan Mobo sa Masbate makalihis an raot nin panahon na dinara kan Bagyong Aghon.
Sa intrevista kan Bombo Radyo Legazpi kay Richard Lupango an head kan Municipal Disaster Risk Reduction and Management Office, wara man nin naireport na nakulogan sa banwaan dara kan bagyo apwera na sana sa nadanyaran na sarong harong asin kotse na nahugpaan nin puon nin kahoy.
Nakabalik naman sa saindang mga harong an nasa 65 pamilya na hali sa tolong barangay na pina-ibakwar durante kan bagyo.
Segun kay Lupango, nakatabang an amay na paghahanda asin marikas na pag-aksyon kan saindang team ngani na maibitaran an perwisyo na dara kan bagyo.
Pinaghahanda naman sa ngunyan kan opisyal an mga residentes sa posibleng pag-abot pa nin mga bagyo, pagbaha asin landslide ngunyan na papalaog naman an La Niña.
Abiso ni Lupango sa mga residentes na mantang amay pa, magpakaray na kan mga naraot na parte kan harong bilang preparasyon sa posibleng mga kalamidad.
