LEGAZPI CITY – Ikina-ugma asin suportado kan Alliance of Concerned Teachers an ipigbubusol sa Kongreso na P50K na sahod kan mga paratukdo.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na P50,000 an saindang pangapodan dati sa kongreso alagad 50 pesos sana an ipigtao kan administrasyon sa dagdag na sahod kan mga paratukdo na nagdurar pa nin apat na taon.
Napapanahon suboot an nasabing pagbubusol huli man sa padagos na pagtaas kan presyo kan babarakalon kasabay na man an pag-abono kan mga paratukdo nganing makabakal sana nin mga gamit sa pagtutukdo na resulta man kan hibabang budget sa education sector sa nacion.
Gigibuhon ninda an gabos nganing maipagana ini asin maibalyo hale sa kongreso pasiring sa senado sagkod na maipaotob.
Pigsabi pa kan opisyal na sa presente an “pang-daraga asin soltero” sana an pigsasahod kan mga paratukdo huli sa kahababaan asin mabawas pa huli man sa mga legal na deduction arug kan SSS, Philhealth asin iba pa.
Mabase an dagdag na sahod kun dudugangan o dodoblehon man an annual budget kan sektor kan edukasyon siring man an nganing dae na magkulang an mga eskwelahan sa learning materials asin dae na mag-abono an mga paratukdo sa kakulangan kan sarong eskwelahan.
May mga benipisyo man kan mga nakaaging taon an dae pa naitatao sagkod ngonian sa mga paratukdo asin an ibang mga eskwelahan man an wara pang clinic maski nagpopoon na an presenteng school year.
Nangapodan man si Quetua sa publiko na tabangan sindang maibusol an dagdag sahod kan mga paratukdo nganing mahiling kan gobierno an mga problemang pigkakahampang kan education sector ngonian na taon.
