LEGAZPI CITY- Nagkaburunyog an mga residentes kan Purok 5, Barangay Kormidal sa syudad kan Tabaco sa pagtabang sa sarong babaying inatake nin highblood asin nagadan mientras na nagta-trabaho.
Sagkod kaya ngunyan, dae pa nin nagka-klamar na kaparientes ki Myrna Francia Mendoza na napag-araman na gikan sa isla kan Rapu-Rapu antes pa man nagtinir sa nasambitan na syudad.
Sa intribista ki Mayor Krisel Lagman-Luistro, sinabi kaini na nagdulok an mga residentes kan barangay sa opisina ni Congressman Edcel Lagman ngani na mabayadan an hospital bill kan biktima sa BRTTH asin nag-arambagan para sa nagkapirang porsyento sa bill sa punerarya.
Sigon ki Mayor Luistro, nakiolay sinda sa funeral parlor na pinagdarahan ki Mendoza ngani na maghagad nin dakulang diskwento.
An LGU na man suboot an nagbayad sa balanse makalihis na mag-uyun an punerarya sa saindang request.// Dugang pa kan opisyal, pig-aasikaso na an loteng lulubungan kaini sa public cemetery.
Napag-araman na igwa nin nawalat na tulong aki si Mendoza na saradit pang marhay kun kaya nagdulok na man sinda sa City Social Welfare and Development (CSWD.)
“Inspired” suboot na marhay si Luistro huli ta napatotoohan sa sitwasyon na ini na talagang namomoot sa kapwa an mga taga-syudad kan pagkamoot.
