LEGAZPI CITY- Nagsasagibo na nin assessment meeting para sa restoration kan kuryente sa probinsya an Albay Electric Cooperative (Aleco).
Segun kay Anj Galero, an tagapagtaram kan Aleco sa intrevista kan Bombo Radyo Legazpi na sa ngunyan, backbone line an saindang pigtatawan nin prayoridad na maibalik an supply kan kuryente.
Pigtaram man kaini na base sa saindang assessment na may nagkapirang isolated area sa probinsya kan Albay an dae pa naibabalik an kuryente asin nasa luwas pa an saindang mga personahes nganing aramon an bilang kan mga poste na nadanyaran kan pangrarapado ni bagyong Kristine.
Pigdugang pa kaini na dae pa sa ngunyan makakatao an saindang opisina nin eksaktong aldaw kun nuarin maibabalik an supply kan kuryente nin huli ta dae pa sigurado an kaligtasan na ibalik ini.
Abiso kaini sa mga konsumidores na maghalat halat sana sa saindang advisory nin huli ta padagos an saindang assessment nganing mapakuryentehan nin amay an probinsya kan Albay.
Pigdugang pa kaini na igwa sindang task force na naglilibot sa mga linya nganing mapalitan an mga posibleng naapektaran na linya kan kuryente asin mga kontador na nalubog sa tubig baha.
Mientrastanto, pig-iimbestigaran man kan Aleco an insidente kan pagkasulo nin sarong jeep asin pagkagadan kan driver kaini makalihis na makasabit sa live wire an nasambitang behikulo.
